Ég elska hvernig þig dreymir

Ég veit ekki hvort það eru margir sem kannast við 1 Giant Leap. Ég kynntist þeim af fræðslumynd um tónlistargerð þeirra í sjónvarpinu og heillaðist gjörsamlega! Ég pantaði diskinn þeirra í gegnum amazon.com og spilaði hann upp til anga! Ekki spyrja mig hvenær þetta var nákvæmlega

Þar sem það á eftir að líða nokkur tími þar til ég skrifa aftur á þessum vettvangi langar mig til að setja inn tvö myndbönd með lögum af þessum diski sem ættu að útskýra hvers vegna ég elska tónlistina þeirra. Í mínum eyrum er þetta hugsvölunartónlist. Tónlist sem nærir sálina af fegurð og kærleika. Tónlist sem minnir mig á hvaða tilfinningu það færir mér að upplifa réttlæti, sátt og samkennd. Tónlist sem færir mér ekki aðeins von, trú og kærleika heldur gerir mig að betri manneskju.

Fyrst er lagið The Way You Dream sem er sungið af indveskri alþýðusöngkonu, Asha Bhosli og Michael Stipe.

Svo er lagið sem stækkar við hverja hlustun: Braided hair. Það má nálgast textann hér.
 

Þeir tveir sem áttu hugmyndina að 1 Giant Leap endurtóku ferðalag sitt um heiminn til að sameina tónlist allra heimsálfa í einu verki. Afrakstur þess ferðalags var myndin 2sides2everything. Ég get ekki beðið eftir að tónlistin sem varð til á ferðalagi þeirra komi út á diski. Hér er kynningarmyndband fyrir seinni myndina en þar útskýra þeir m.a. hvað þeim gengur til með verkum sínum.

Vona að þið njótið tónlistarinnar eins og ég og góðar stundir

Í lausnum hennar felast enn meiri ógöngur

Kannski eykur sú stjórn sem er í burðarliðnum einhverjum bjartsýni. Það er því kannski ljótt að lýsa því yfir að ég finn fyrir sístækkandi hnút í maganum yfir því sem mér finnst liggja í lofti þess spennuþrungna falslogns sem ríkir í samfélaginu á meðan Jóhanna og Steingrímur þæfa stjórnarsáttmálann.

Ég hef stórar áhyggjur vegna þess að mér finnst hvorki Jóhanna né Steingrímur hafa gert neitt sem sýnir að þau hafi burði til að takast á við raunveruleika þeirra vandamála sem blasa við almenningi í landinu. Hér er t.d. samantekt Lóu Pind Aldísardóttur á því sem þau bjóða þeim sem er að kikna undan húsnæðislánunum sínum. Ég birti hana hér í tveimur hlutum en samantekt Lóu var sýnd í Íslandi í dag 15. apríl sl. Kíkið endilega á þetta ef þið eruð ekki búin að sjá þetta.

Takið sérstaklega eftir því sem stjórnmálamaðurinn Árni Páll Árnason segir annars vegar og lögfræðingurinn Björn Þorri Viktorsson segir hins vegar undir lok seinni hlutans. Ég leyfi mér svo að taka undir spurningu sem er ýjað að hér sem er eitthvað á þessa leið: Hverjum er það til gagns að keyra tugþúsundir íslenskra heimila og fyrirtækja í gjadþrot með þessum aðferðum?

Svo ætla ég að draga mig aftur í hlé og velta því fyrir mér hvenær þjóðin rís upp aftur og stendur fast í fæturnar í kringum þá réttlátu kröfu að hún verði ekki keyrð niður til örbirgðar til þess að verja hagsmuni þeirra sem rændu hana! Þegar þar að kemur þá rís ég upp líka og tek undir!

Ný ríkisstjórn um næstu helgi