Áframhaldandi mótmæli á Akureyri

Áttunda lýðræðisgangan verður farin á Akureyri n.k. laugardag (20. desember) kl. 15:00. Gengið verður frá Samkomuhúsinu inn á Ráðhústorg. Í kynningunni segir að þar muni ýmsir mætir borgarar taka til máls. Þeirra á meðal:

Huginn Þorsteinsson, heimspekingur.

Jökull Guðmundsson, lífeyrisþegi.

Embla Eir Oddsdóttir, íslensk kona.

 

Myndin hér að neðan er tekin í upphafi fyrstu göngunnar á Akureyri.

Þessa mynd tók Guðrún Þórs hins vegar á síðasta mótmælafundi en þá gaf lögreglan mótmælendum heitt kakó að ylja sér á.

Sannast sagna hef ég átt einstaklega erfitt með að einbeita mér að jólaundirbúningnum þetta árið og ég efast um að samviskan láti mig í friði ef ég mæti ekki í þessa síðustu mótmælagöngu fyrir jólin. Svo ætla ég að taka mér tak. Skrúfa aðeins niður í samkenndinni sem rekur mig áfram í það að fylgjast með því sem fram fer í fjölmiðlum og hér á blogginu í sambandi við afdrif lands og þjóðar. Mér finnst að ég megi til. Ekki síst sjálfrar mín vegna og minna nánustu.

Eftir mótmælin n.k. laugardag ætla ég að gefa mig óskipta að jólunum og undirbúningi þeirra. Vona að mér takist það þó ég hafi svo sannarlega áhyggjur af afdrifum fjárlagafrumvarpsins í höndunum á þessari ríkisstjórn... Finnst þess vegna vel við hæfi að enda að þessu sinni með athugasemd af kjósa.is:

ég er mjög óánægð með hvernig stjórnvöld halda á öllu eftir hrun bankanna og því miður verðum við sem höfum alltaf gætt okkur í fjármálum og ekki lifað í lúxus látin gjalda fyrir fólk sem hefur ekki bara komið öllu þjóðfélaginu á hausin heldur einnig svert mannorð okkar út um allan heim

Athugasemdir

[Jakobína Ingunn Ólafsdóttir, 19.12.2008 kl. 00:55]

Já það er ekki seinna vænna að fara að huga að jólum. Mín reynsla er að þau koma hvað sem hver segir. Ég reyni að kúpla mig dálítið frá fjölmiðlunum en fréttirnar koma alltaf á endanum í flasið á manni.

Það þýðir samt ekki annað en að fara að baka piparkökur með krökkunum um helgina og fara svo að versla í jólamatinn.

Ég er alveg hætta skilja í efnahagsstjórnuninni hér á landi. Segi bara það er skítur í pokahorninu. Kannski kemur meira í ljós þegar ríkisstjórnin fer að gera jólahreingerninguna.

[Rakel Sigurgeirsdóttir, 19.12.2008 kl. 02:59]

Þetta er hverju orði sannara bæði þetta sem þú segir um jólin og efnahagsstjórnina!