Grafskrift þjóðar

Kveikjan að þessum skrifum er Fésbókarstatus sem Daði Ingólfson setti á vegginn hjá sér sl. miðvikudag. Þar sagði hann: „Að lesa fyrirsagnir netmiðla í dag er að lesa grafskrift þjóðar.“ Í framhaldinu vísaði hann í nokkrar fréttir frá þessum sama degi.

Sú sem ber hæst í þessari upptalningu hans er fréttin af sýknu, fyrrum yfirmanna í íslensku fjármálalífi, í svoköllluðu Exeter-máli af öllum ákærum sérstaks saksóknara. Einn af þeim sem tjáir sig í framhaldinu bendir á enn eina fréttina af starfsglöpum hins vanhæfa Alþingi.

Málið snýr að greiðslu hlutabóta til þeirra sem ekki eru í fullri vinnu. Þessar bætur falla niður um næstu mánaðarmót vegna þess að í öllum atganginum sem einkenndi störf þingsins fyrir þinglok núna í júní þá gleymdist að framlengja bráðbirgðaákvæði sem hafði verið sett um þess konar bætur.

„Þetta bara gleymdist,“ segir Guðbjartur Hannesson velferðarráðherra „og var alveg sameiginlegt klúður allra.“ Meginvandinn í þessu máli virðist vera spurningin um það hvort skiptir meira máli að þingmenn haldi sumarfríi sínu óröskuðu eða að þeir sem þurfa að treysta á þessar bætur haldi þeim. Það er rétt að taka það fram að þær falla niður nema þing komi saman fyrir þennan tíma og samþykki framlengingu.

Það væri endalaust hægt að bæta við og dettur mér þá ekki síst í hug frétt á DV um að rússnesnka mafían hefur fengið forsvarsmann í Geira í Goldfinger til að atast í því að hún fái að opna spilavíti í Perlunni.


Og svo var það viðtalið við Michael Porter í Kastljósþættinum á þriðjudagskvöldið. Mér var svo lokið að mér datt helst í hug að græðgisöflin væru að auka í áróðursstríðið gegn hrelldri þjóð til að keyra hana endanlega með höfuðið niður á milli hnjánna. Það er a.m.k. ljóst að þannig verður auðveldara að koma því tvennu í kring sem er opinbert um fyrirætlanir stjórnvalda til að blása lífi í næstu bólu.

Það var örugglega engin tilviljun að Porter fékk þetta drottningarviðtal í Kastljósinu í sömu viku og formlegar aðildarviðræður Íslands að ESB hófust. Það er líka ljóst hverjum eftirfarandi orð hans eru ætluð: „Möguleikar Íslendinga eru svo óendanlega miklir á sviði jarðvarma að það væri mikil synd og skömm að bíða með framkvæmdir þar til aðrir hafa tekið fram úr ykkur." Þeir sem hann talar til eru þeir hinir sömu sem trúa því enn að varanleg verðmæti verði til með því að eyða því sem er ekki til!

Þetta er stjórnmálamannakynslóðin sem tekst ekki að þroskast upp úr minnimáttarkenndinni gagnvart smæð okkar og sögu. Þetta er stjórnmálastéttin sem berst fyrir því að koma fulltrúum sínum að við það háborð sem minnimáttarkenndin gerir Evrópusambandið að í hugum þeirra.

Hin minnmáttarkomplexaða og nýríka valda- og eignastétt landsins hefur nýtt sér áróðursmiðla sína af miklu móð í þessari viku til að halda fríðindunum af því að ganga inn í ESB á lofti. Þetta sást m.a. á forsíðu Fréttablaðsins sl. miðvikudag þar sem ein fyrirsögnin segir: „Vísinda- og menntasamstarf Ísland við ESB skilar miklu meiru en það kostar: Ávinningurinn tíu milljarðar“ Það skiptir auðvitað engu hvað Ísland greiðir í þáttökugjald eða í hverju þessu ávinningur er fólgin fyrir aðra en styrkþegana sjálfa.

Samkvæmt þeim sem reka áróður sinn í gegnum fjölmiðla þá er peningaupphæðin ein og sér ávinningur en við lesendur kunnum að sjálfsögðu að lesa á milli línanna. Það  kemur nefnilega í ljós við lestur þessarar fréttar hverjir eru stærstu styrkþegarnir. Í tilfelli næststærsta styrkþegans er ávinningurinn fyrir þá sem vilja ganga í Evrópusambandi a.m.k. greinilegur spurning með þann stærsta.

Stærsti styrkþeginn er Íslensk erfðagreining sem er í mínum huga eitt dularfyllsta fyrirtæki landsins. Þrátt fyrir að nú séu liðin 10 ár frá því að Kári Stefánsson, vinur Davíðs Oddssonar, barði þetta fyrirtæki fram þá er ekkert hægt að segja um starfsemi þessa fyrirtækis sem byggjandi er á. Það eru alltaf sömu innantómu klisjurnar um það hvað þetta er einstakt fyrirtæki og mikilvægt en aldrei neitt um raunveruleg dæmi sem rökstyðja markvirði þess!

Hvers vegna ætli þetta fyrirtæki fái 1,4 milljarð í styrk í gegnum ESB? Ég man ekki eftir einni einustu stóruppgötvun sem hefur verið gerð í glerhýsinu úti í mýrinni sem hefur breytt neinu nema maður eigi að telja Hannes Smárason til slíkra. Er það ekki annars rétt munað að hann hóf feril sinn þar? Það skyldi þó aldrei vera að það í hverju markvirði Íslenskrar erfðagreiningar liggur þoli ekki frekar dagsins ljós en starfs- og fjármálaferill Hannesar Smárasonar.

Næstsærsti styrkþeginn er svo Háskóli Íslands með rúman milljarð (eða eitthvað svolítið minna en Íslensk erfðagreining) Hér er kannski komin skýringin á því að það heyrast engar alvöru gagnrýnisraddir úr fræðimannasamfélaginu varðandi það sem fram fer í samfélaginu. Mér, eins og mörgum, hefur fundist þögn þess skerandi en meðvirkni þeirra sem opna munninn er eiginlega hálfu verri.

Það er ekki síður undarlegt að þeir fáu sem hafa tekið sig til og gagnrýnt hafa aldrei horft á heildarsamhengið heldur taka einungis afstöðu til vel valinna og þægilegra smápúsla í heildarmyndinni. Það vantar alltaf einhvern grundvöll í málflutnning þeirra eða þeir þora ekki að taka alla samfélagsgerðina ásamt uppbyggingu fjármálakerfisins til gagn- gerrar umræðu. Það er þess vegna lítið eða ekkert gagn af innleggjum þeirra í samfélagsumræðuna og nú ætti það að vera ljóst hvers vegna.

Það er fínt að fá ESB til að kosta rannsóknarleyfin þeirra. Skítt með hitt pakkið! Ég gef lítið fyrir menntun og sérfræðinþekkingu þeirra sem sjá ekki samhengið á milli sinna eigin styrkveittu leyfa og þess hvaðan peningarnir koma?

Ef menntun er orðin einn helsti útvörður græðginnar þá er ljóst að mennskan, sem orðið er dregið af, hefur verið úthýst og því varla hægt að tala um neina menntun lengur! en sérhæfð vanhæfing á hins vegar afar vel við um fræðimann sem sér ekki út fyrir þann fílabeinstrun sem Evrópubáknið hefur kostað utan um hann.

Verðmætasköpunin sem kemur út úr ofantöldum styrkjum er ekki tíunduð í Fréttablaðinu enda fréttin greinilega byggð á skrifum forstöðumanns þeirrar Rannskóknarþjónustu Háskólans sem rannsóknarstyrkir Evrópusambandisins fara í gegnum. Þar er aðeins talað um mikilvægar upphæðir til reksturs og reyndar til rannsókna.

Ég er hædd um að verðmætin sem hægt er að telja séu heldur rýr og leyfi ég mér því að halda því fram það að tala um ávinning í þessu sambandi sé hrein og bein glópska! Nema það væri nær að kalla slíkan málfltuning um ofangreind atriði hreinan áróður!

Allt leiðir til þeirra niðurstöðu að það er við hæfi að tala um grafskrift þjóðar og rétt að árétta það að þeir sem trúa því enn að varanleg verðmæti verði til með því að eyða því sem er ekki til í eitthvað sem verður ekki að neinu hafa ekkert lært frá því þeir prentuðu peninga fyrir óhrygnda fiska!

Aukin samþjöppun hefur jákvæð áhrif

Athugasemdir

[Elín Sigurðardóttir (IP-tala skráð) 1.7.2011 kl. 18:44]

Sameiginlegt klúður hljómar sakleysislega. Mér datt í hug cosa nostra þegar ég las þessa frétt. Þetta er orðið óhuggulega krípí sker.

http://mbl.is/frettir/innlent/2011/07/01/vardar_vid_log_ad_rjufa_thagnarskyldu/

[Jón Steinar Ragnarsson, 1.7.2011 kl. 19:41]

Mest af þessum styrkjum fer svo í að skrifa lof um styrkveitandann og kalla það rannsóknarvinnu, eða þá að skrifa langlokur um ömurleika Íslenskar menningar og þjóðerniskenndar og lepja latte á milli.

Yfirþjóðernishroki háskólaelítunnar er skelfilegt dæmi um að sagan endurtekur sig. Ein Vol, ein reich, ein furhrer.  Þeir segja svo að draumurinn um sambandsríki Evrópu eða fjórða ríkið, sé til komin svo sagan endurtaki sig ekki og til að koma í veg fyrir stríð í álfunni. Þeir gleyma því að öll stríð í álfunni eru fyrir þennan imperíalisma og dturlunnardrauminn um eitt ríki Evrópu. Öll stríð s.l. 300 ára hafa verið háð vegna þessa og nú sést hvert stefnir svo engum dylst, nema hvað RUV og "Félagshyggjuöflin" (lesist: sósíalísku) og fjölmiðlar dúmunnar við austurvöll reyna hvað þeir geta til að þegja þau teikn í hel.

Landráð segi ég, ofnotað eða ekki, þá er ástæða fyrir því að hugtakið er svo fleygt þessa mánuðina.

[Jón Steinar Ragnarsson, 1.7.2011 kl. 19:44]

Mig undrar ekki að þeir hjá stjórnlagaráði vilji nú leggja niður landsdóm. Hann bíður nefnilega ansi margra þegar storminn lægir. Nei, segi ég, lansdóm þurfum við aldrei sárar en nú.

[Ásthildur Cesil Þórðardóttir, 1.7.2011 kl. 20:48]

Æ ég fyllist vonleysi við að heyra svona, mér finnst eins og elítan sé algjörlega heilalaus og full af græðgi og um leið minnimáttarkennd gagnvart útlenskri elítu og vilji allt vinna til að koma okkur þangað. Ég vil fá að lifa með reisn, örugg í mínu eigin landi og örugg um að ráðamenn séu heiðarlegir og vilji vinna hag þjóðarinnar það besta en ekki bara hlaða undir sig og sína.  Burt með þetta fjandans landráðapakk og gungur og druslur.  Ég vil fá að kjósa og koma þessu liði öllu saman frá.

[Rakel Sigurgeirsdóttir, 2.7.2011 kl. 00:45]

Elín, Ómar Geirsson hittir naglann á höfuðið varðandi fréttina sem þú bendir á. Sjá hér.

Jón Steinar, kærar þakkir fyrir þín góðu innlegg!

Ásthildur, það var síst ætlunin að fylla þig eða aðra vonleysi. Mig langaði til að vekja til umhhugsunar og athafna. Við verðum nefnilega að sporna á móti og knýja fram breytingar á því kerfi sem elur af sér þá græðgisglópsku sem þessari færslu var ætlað að vekja athygli á. Að mínu viti er það uppbygging fjármálakerfisins sem er rót vandans. ESB er einn anginn af rót þessarar sníkjuplöntu.

[Ásthildur Cesil Þórðardóttir, 2.7.2011 kl. 08:47]

Rakel mín það ert ekki þú sem fyllir mig vonleysi, þvert á móti er ég afskaplega ánægð með alla þína framgöngu og baráttu það er sem ljós í myrkri.  Það er bara ástandið, kæruleysi forystumanna eða einlægur brotavilji.

Ég er sammála því að við þurfum að berjast gegn þessari vá með oddi og egg.  Þó það fari mest fram í orði og riti eins og hjá mér.  Þá er ég afar þakklát ykkur sem standið í eldlínunni og get best reynt að styðja við bakið á ykkur, og láta ykkur vita að ég virði ykkar baráttu og styð alveg 100%

[Gunnar Skúli Ármannsson, 3.7.2011 kl. 15:23]

Góð færsla og sönn lýsing á fyrringu mannskepnunnar!