Opið bréf til Guðbjarts og Gylfa

Undanfarin misseri hafa fjölmargir einstaklingar reynt að ná eyrum valdsins með afar fjölbreytilegum aðferðum. Sumir hafa aðhyllst fundarhöld  en einhverjir halda því fram að beinar aðgerðir séu mun líklegri til að skila árangri. Loks eru það þeir sem telja að blogg og greinarskrif séu líklegust til að ná árangri í þeim tilgangi að koma sjónarmiðum á framfæri þannig að eftir þeim verði tekið.

Nú hafa nokkrir þeirra sem hafa ítrekað reynt að ná eyrum valdhafa og forystumanna samfélagsins tekið sig saman og ákveðið að fara að fordæmi AGS-hópsins sem tók sig saman haustið 2009 og átti í bréfasamskiptum við Dominique Strauss (sjá t.d. hér). Markmið þeirra einstaklinga sem hafa tekið sig saman að þessu sinni er að fá svör frá ráðamönnum við áleitnum spurningum um ýmis konar málefni sem varða líf og kjör íslensks almennings.

Þeir eru átta sem skrifa undir þetta fyrsta bréf en það hefur verið sent á velferðarráðherra og forseta ASÍ.

Reykjavík 23. febrúar 2011

Ágæti, Guðbjartur Hannesson, velferðarráðherra.

Viss hluti samlanda okkar þarf að lifa á lágmarkskjörum frá einum mánaðamótum til þeirra næstu. Til þessa hóps teljast: öryrkjar, ellilífeyrisþegar, atvinnulausir, félagsbótaþegar og starfsmenn á lágmarkslaunatöxtum. Flestallir sem koma að ákvörðun um hversu mikið einstaklingar í þessum hópum hafa úr að spila hafa margfalt hærri tekjur og eru sökum þess illa búnir til að meta aðstæður skjólstæðinga sinna rétt.

Heildartekjur upp á 160 þúsund krónur á mánuði er staðreynd fyrir stóran hóp Íslendinga. Bæði rannsóknir þinna eigin starfsmanna, sérfræðinga og hyggjuvit meðalmannsins benda ótvírætt til þess að nánast ómögulegt sé að ná endum saman með fyrrnefndri upphæð.

Eftir umfangsmikla vinnu á vegum velferðarráðuneytisins var nýlega lögð fram ákaflega gagnleg skýrsla um neysluviðmið (sjá hér). Hún er vel unnin í alla staði og gefur góða vísbendingu um hvað fólk þarf að lágmarki til að framfleyta sér.

Vegna þessarar skýrslu var sett upp reiknivél (sjá hér) á vef ráðuneytisins. Samkvæmt henni þarf einstaklingur í leiguíbúð 300.966 krónur í ráðstöfunarfé til þess að eiga fyrir nauðþurftum og öðru sem telst til mannréttinda eins og húsnæði og virkri þátttöku í samfélaginu.

Í ljósi alls þessa leitum við til þín með eftirfarandi spurningu:

Hvernig myndir þú, ágæti Guðbjartur, ráðleggja fólki að ná endum saman með áðurnefndum hundrað og sextíuþúsund króna tekjum á mánuði?

Ráðleggingar þínar gætu orðið upphafið að bættri umræðu um núverandi vandamál þeirra einstaklinga sem glíma við þessa spurningu 12 sinnum á ári.

Virðingarfyllst og með ósk um svör,

Ásta Hafberg
Björk Sigurgeirsdóttir
Gunnar Skúli Ármannsson
Elías Pétursson
Jón Lárusson
Kristbjörg Þórisdóttir
Ragnar Þór Ingólfsson
Rakel Sigurgeirsdóttir

Bréf með sömu fyrirspurn var send á Gylfa Arnbjörnsson, forseta Alþýðusambands Íslands, og afrit á alla fjölmiðla.