Draumur markaðshyggjunnar um Evrópusambandsaðild

Ræða flutt á útifundi Rauðs vettvangs sem var haldinn fyrr í dag. Ræðumenn auk mín voru: Anna Ólafsdóttir Björnsson og Þorvaldur Þorvaldsson. Ræðurnar munu birtast innan tíðar á bloggi Rauðs vettvangs en hér er ræðan mín:

Ágætu borgarar þessa lands!

Mig langar til að höfða til ykkar, sem hér eruð viðstödd, þegar ég vara við draumi markaðshyggjunnar um aðild að Evrópusambandinu. Það skiptir ekki máli hvort sú markaðshyggja vill kenna sig við hægri eða vinstri. Við höfum líka öll reynslu af því að það markaðshyggjusamfélag, sem hér hefur verið rekið á undanförnum árum, skilar okkur, almennum borgurum, engan veginn réttlátu þjóðfélagi!

Ég er ein af ykkur. Flest ykkar hafið sennilega fæðst hér eins og ég, alist hér upp og gert ykkar framtíðarplön út frá því að hér væri gott að búa. Sjálf ólst ég upp í íslenskri sveit, sótti alla mína menntun hérlendis og hef alið hér manninn alla tíð. Þó útþráin hafi stundum togað í mig þá ákvað ég að vera hér kyrr. Það sem réð mestu í því sambandi voru börnin mín. Mér fannst það nefnilega vera eigingirni af minni hálfu ef ég sliti þau upp og flytti þau burt frá rótum sínum.

En nú er allt breytt! Ég reikna líka með að flest ykkar deilið áhyggjum mínum af framtíð kynslóðanna í þessu landi með mér. Ógnirnar sem að okkur steðja eru margvíslegar en frá mínum bæjardyrum séð er markaðshyggjan, sem setti okkur í þau spor sem við stöndum í núna, rót þeirra allra. Draumurinn um að tilheyra Evrópusambandinu er ein af þeim alvarlegri því að ef af verður þá höfum við ofurselt okkur lögmálum markaðarins þar með um ókomna framtíð.

Ég hef alltaf goldið varhug við því að setja örlög mín í hendur fjöldaframleiddra fræðinga í háreistum skrifstofubyggingum. Það er því síst til að draga úr áhyggjum mínum varðandi framtíðina þegar það á að setja örlög heillar þjóðar í hendurnar á þannig liði! Takið líka eftir því að við erum að tala um lið þar sem æðstu stjórnendurnir verða staðsettir í allt öðru landi! Þetta lið er í aðalatriðum skipað langskólagengnum fræðingum sem ég leyfi mér í fullri alvöru að efast um að hafi kynnst þeim yfirgripsmikla veruleika sem þeir eru að fást við nema af Exel-skjölum framan á tölvuskjá.

Íslensk stjórnvöld, með Samfylkinguna í fararbroddi, keppast samt við að selja okkur þá hugmynd að okkur sé best borgið í exelskjalabólstruðum faðmi slíks fræðimannahers sem Evrópusambandsbáknið er. Einn ráðherra Samfylkingarinnar hefur meira að segja reynt að halda því fram að hér hefði aldrei skollið á nein kreppa ef við hefðum þegar verið gengin inn í sambandið! Eins og þið áttið ykkur á er ég að vísa til orða núverandi utanríkisráðherra sem höfð voru eftir honum fyrir ekki svo löngu síðan.
Maður sem tók þátt í að setja landið á hausinn með heimsku sinni er ekki maður sem mér þykir vert að hlusta á! Skiptir engu þó hann hafi af einhverjum ástæðum verið gerður að utanríkisráðherra! Þeir sem hafa lesið tilsvör hans í Rannsóknarskýrslunni, 7. bindinu, velkjast varla í vafa um það að Össur Skarphéðinsson hefur ekki hundsvit á því sem hann er að fást við! Það er því út í hött að taka nokkurt mið af því sem hann segir um ástand efnahagsmála í fortíð, nútíð eða framtíð enda er haft eftir honum í Skýrslunni að „hann hafi bara akkúrat ekkert vit á bankamálum!“ (bls. 26 í 7. bd. Skýrslunnar)

Það þarf ekki nema meðalskynsemi til að skilja það að maður bankar ekki upp á í fullbyggðu húsi á nærbuxunum einum fata og býður upp á sambúð! Hins vegar er rétt að benda á það að þó Evrópusambandið líti út fyrir að vera fullbyggt hús þá eru innviðir þess allt annað en glæsilegir enda eru þeir af sama efni og settu hér allt á hausinn haustið 2008. Innviðirnir í þeirra húsum eru líka teknir að fúna.

Það nægir að líta til nokkurra nágranna okkar til að átta sig á þessari stað- reynd. Ég læt mér nægja að minna á Írland og Grikkland í þessu sambandi og spyr mig og ykkur öll: Að hvaða leyti er staða okkar nú verri en þeirra þjóða sem byggja þessi lönd? Er líklegt miðað við það hvernig hefur verið brugðist við þeim vanda sem hefur steðjað að hagkerfum þessara þjóða að okkur sé betur borgið í Evrópu- sambandinu? Ég segi: NEI!

Evrópusambandið og ungur gjaldmiðill þess riða til falls og mun taka þær þjóðir sem hafa ánetjast því með sér! Það verður fámenn auðmannastétt sem hagnast á falli þess en hinn almenni borgari mun standa eftir fátækari en nokkru sinni. Evrópusambandið varð heldur ekki til í því markmiði að bæta lífskjör hins almenna borgara heldur til að stjórna markaðinum og í þeim tilgangi hafa æðstu stjórnendur þess gefið út ótrúlegt langlokuregluverk um hvaðeina.

Regluverk Evrópusambandsins hefur sett danska blómaræktendur á hausinn en tryggt Hollendingum einokunarstöðu á blómamarkaðinum. Ávaxtaframleiðendur víða á Evrópusvæðinu geta ekki lengur keppt við þá sem búa við Miðjarðarhafið vegna staðla Evrópusambandsins sem kveða m.a. á um það hvernig lögun og lengd bananans á að vera til að hann lendi í söluvænlegasta flokknum.

Ef við göngum inn í Evrópusambandið þurfa íslenskir bændur, meðal annarra, að taka mið af reglum sambandsins varðandi það hvað má bera á tún og hvaða fóður skepnur eiga að nærast á. Svo nokkur dæmi séu tekin. Samkvæmt reglum sambandsins má t.d. ekki nýta innihald haughússins til að bera á tún og kálfar sem eru aldir upp fyrir kjötmarkaðinn má ekki setja í hagagöngu.

Síðasta dæmið sem ég nefni hér sel ég ekki dýrara en ég keypti það. En það er að staðlaráð Evrópusambandsins hefur m.a.s. gefið út nákvæm fyrirmæli um það hvað fætur undir stólum eiga að vera margir til að þeir geti talist til slíkra. Hvaða stólahönnuður ætli hafi komið þessu þröngsýnissjónarmiði sínu að inn í reglugerðarfarganið?

Ég gæti haldið upptalningu af þessu tagi áfram en þessi ætti að duga til að færa ykkur heim sanninn um það að það að ganga inn í Evrópusambandið tryggir okkur ekki fyrir því sem varð íslensku hagkerfi að falli! Þ.e. einkavinavæðingunni og/eða krosstengslunum. Í kerfi sem byggist á markaðinum þá verða alltaf einhverjir sem reyna að sölsa hann undir sig með áhrifum sínum, völdum og peningum. Markaðskerfið sem Evrópusambandið byggir á er ekkert öðru vísi hvað það varðar!

Til að draga það enn skýrar fram hvers vegna ég er á móti inngöngu inn í Evrópusambandið vil ég undirstrika það að af gildum ástæðum, sem öll þjóðin hefur reynt á eigin skinni, þá trúi ég ekki á þau lögmál markaðarins sem sambandið byggir á. Ég trúi heldur engan veginn á sanngirni reglugerðarfargansins sem sambandið hefur smíðað utan um hann.

Ég minni á að saga okkar geymir reynslu forfeðra okkar af því að fela öðrum stjórn landsins. Ég efast um að við verðum í reynd mikið betur stödd með ákvarðanatöku varðandi öll mikilvægustu mál lands og þjóðar í háreistri skrifstofubyggingu í Brussel en við vorum þegar við vorum undir nágrönnunum í Kaupmannahöfn. Ég leyfi mér að efast um að einokunarverslun undir flaggi ESB eigi eftir að reynast okkur mikið betur en sú sem var rekin hér í aldaraðir undir því danska.

Það vekur mér líka mjög mikla tortryggni að þjóð sem kemur á nærbuxunum og biður um Evrópusambandsaðild skuli yfir höfuð fá áheyrn! En þegar betur er að gáð þá erum við nefnilega alls ekki eins illa stödd og af er látið! Lítið allt í kringum ykkur og munið eftir forferðum okkar sem þrátt fyrir enga tæknikunnáttu gátu tórað hér undir danskri einokun. Þeir höfðu ekkert að treysta á nema það sem landið gaf af sér og eigið þolgæði.

Við höfum hér allt til alls til að lifa hér góðu lífi! Við eigum nú þegar gríðarlega öfluga matvælaframleiðslu sem við nýtum okkur þó engan veginn til fulls. Við gætum t.d. framleitt allt okkar grænmeti sjálf! Ef við höguðum okkur skynsamlega þá gætum við t.d. nýtt jarðvarmaorkuna frá Þeystareykjum fyrir grænmetisver á Húsavík í stað þess að samþykkja að hún verði nýtt til að knýja enn eitt álverið!

Við eigum enn þá: fiskinn, vatnið, jarðvarmann og fallvötnin en þetta er allt í bráðri hættu ef þjóðin ætlar að fljóta sofandi að þeim feigðarósi sem markaðshyggjuöflin innan hinnar svokölluðu norrænu velferðarstjórn stefnir okkur í.

Ég hvet ykkur hvert og eitt ykkar til að  spyrna við fótum og vakna til meðvitundar um það hverjum er best treystandi fyrir framtíð þinni og afkomenda þinna.

Ég fullyrði að framtíð okkar er engan veginn skynsamlega tryggð með því að setja hana í hendurnar á skrifstofubákni sem er stjórnað af erlendum fræðingaher Evrópusambandsins!

Af öllu framansögðu ætti að vera ljóst hvers vegna ég hafna alfarið inngöngu Íslands inn í Evrópusambandið!

Ég þakka áheyrnina

Útifundur gegn ESB

Athugasemdir

[Lísa Björk Ingólfsdóttir, 16.7.2010 kl. 21:06]

Þakkir fyrir þennan pistil. Nú ríður á að standa saman þegar ljóst er að Evrópusambandið fer jafnvel í reglugerðarbreytingar til að ná að innlima Ísland í ESB sem fyrst.

http://www.welcomeurope.com/news-en-Iceland-to-receive-pre-accession-funding--6372.html

[Valsól (IP-tala skráð) 16.7.2010 kl. 22:45]

ef við göngum í ESB þá lækka vextir á öllum lánum til heimilanna og fyrirtækja um 228 miljarða á ári, já 228 miljarða á hverju ári. Þetta eru peningar sem ég og þú eigum og verðum að vinna hörðum höndum fyrir og láta síðan af hendi við fjármagnseigendur. Að ganga í ESB yrði þess vegna mesta kjarabót sem íslenskum almenningi mun nokkurn tíman standa til boða. Hugsið ykkur einnig allar vinnustundirnar sem almenningur þarf að leggja á sig til að borga þessa 228 miljarða á ári. Þetta er fórnarkostnaðurinn sem við borgum fyrir að vera ekki í nánara samstarfi við aðrar þjóðir, og husið ykkur einnig hve við gætum búið börnunum okkar betra líf ef ekki kæmi til þetta rán á hverju ári. Einnig má velta því fyrir sér allan þann frítíma sem fólk hefði ef það þyrfti ekki að vinna myrkran á milli til að borga þessa okurvexti. Áfram ESB!!!!

Svona lán munu bjóðast Íslendingum ef þeir ganga í ESB. Þeir gætu valið á milli

   1. Lán með 4 prósenta föstum vöxtum til 30 ára.

   2. Lán með breytilegum vöxtum til 30 ára. Vextirnir á því láni eru nú 1,9 prósent og geta aldrei farið upp fyrir 5 prósent.

  

Sumir Íslendingar vilja borga sín lán með verðtryggingu og vöxtum 17 falt til baka, þ.e. þeir sem eru á móti því að ganga í ESB. Þessi kjör hér að ofan standa dönskum almenningi - og öllum Evrópubúum ef út í það er farið - til boða. Og þau eru öll óverðtryggð enda slíkt fyrirbæri óþarft í heilbrigðum hagkerfum. Þau sem sagt lækka í hvert skipti sem borgað er af þeim. Ef við tökum lán til 40 ára hér á landi og miðum við 5% vexti og 5% verðbólgu, sem sagt allt í fína lagi, þá þurfum við að borga hátt í 200 miljónir til baka á þessum 40 árum. Ef við tökum lán á evrusvæðinu 20 miljónir til 40 ára, þá þurfum við að borga 24 miljónir til baka. Hvort vilt þú?

Gott fólk, út af hverju takið þið ekki afstöðu til ESB út frá því hvort það komi ykkur persónulega vel eða ekki? Kvótagreifinn tekur afstöðu til ESB út frá því sem er best fyrir hann, óðalsbóndinn tekur afstöðu út frá því sem er best fyrir hann. Hvað með þig, langar þig að borga húsnæðislánið þitt 10 falt til baka, eða rúmlega einu sinni til baka? Hættum þessu bulli að láta einhverja sérhagsmunasambönd teyma okkur út í stuðning við örfáa aðila, tökum bara afstöðu til ESB út frá því sem kemur okkur sjálfum og fjölskyldum okkar best. Hvort viltu borga til baka af 20 miljóna króna íbúðarláni, 200 miljónir eða 24? Ertu flón eða maður sem stendur með sjálfum þér?
Lestu eftirfarandi og spurðu sjálfan þig hvort það sé þess virði að styðja við bakið á kvótagreifum og óðalsbændum? Hversu miklu ertu tilbúinn að fórna svo sérhagsmunaaðilar sofi rólega á meðan þú borgar af láninu þínu?



Samkvæmt útreikinginum á kostnað við fasteignalán til fjörutíu ára í Þýskalandi á fasteignavefnum Immobilienscout:=> Fjárhæðin skiptir ekki máli fyrir útreikningana, hún vex í sama hlutfalli hversu há sem hún er, en við miðuðum við 100.000 evrur og þá 4% vexti sem gefnir eru upp til viðmiðunar.

Vaxtarkostnaður við slíkt lán væri 19.475 evrur. Það er, heildarfjárhæðin sem lántaki greiðir til baka á 40 árum er 119.475 evrur. Vaxtakostnaðurinn er tæp 20% af lánsfjárhæðinni.
Kostnaðurinn við þýskt húsnæðislán til 40 ára er því undir 20% af lánsfjárhæðinni. Kostnaðurinn við íslenskt húsnæðislán til sama tíma, miðað við 6% vexti og 5% verðbólgu, er yfir 800% af lánsfjárhæðinni. Munurinn á 20% (0,2x) og 800% (8x) er fertugfaldur.

[Lísa Björk Ingólfsdóttir, 16.7.2010 kl. 22:54]

Fyrirgefðu Valsól. Afhverju ættu vextir heimila að lækka? Gegnistryggðu lánin eru ólögleg. En auðvitað er þessi áróður ESB það sem fólk grípur á lofti.

[Pétur (IP-tala skráð) 16.7.2010 kl. 23:26]

Mikið er nú gott að þessi samtök hafi orðið lögmáli Godwins að bráð með þessari vægast sagt ömurlegu notkun á hakakrossinum.

http://en.wikipedia.org/wiki/Godwin%27s_law

[Vilhjálmur Andri Kjartansson (IP-tala skráð) 16.7.2010 kl. 23:35]

Valsól: Grikkland fór á hausinn vegna þess að vextir voru of lágir og enginn sparnaður var til í hagkerfinu. Er Grikkland fyrirmynd ykkar sem viljð lága vexti, FIAT money og minnkandi verðmætasköpun?

[Lísa Björk Ingólfsdóttir, 16.7.2010 kl. 23:37]

Merkilegt hvað ESB sinnar eru alltaf orðljótir en hafa engin rök fyrir málefnum sínum.

[Rakel Sigurgeirsdóttir, 17.7.2010 kl. 00:52]

Ég sé að Lísa og Vilhjálmur hafa alveg séð um andsvörin fyrir mig í fjarveru fyrir mig. En ég má til að bæta við. Það er nefnilega alveg ljóst að markaðshyggjuöflin sem vilja koma landinu inn í ESB munu nota alveg sömu aðferðir og voru notaðar fyrir hrunið til að ginna almenning til fylgist við þá leið sem er gróðavænlegust fyrir þau sjálf.

Ein aðferðin er einmitt þessi að halda því fram að með því að ganga inn í ESB munu vextir lækka og kjör almennings þar af leiðandi batna. En hver er þá skýringin á stöðu Íra, Grikkja og Letta í dag? Hvers vegna er svo hlutfall atvinnulausra svona hátt í aðildarríkjum ESB? Hvernig er hægt að tala um kjör almennings batni þegar heilu atvinnugreinarnar munu þurrkast út og jafnvel heilu stéttirnar? Mér er bara spurn?

Og Pétur: hvaða samtök ertu að tala um? Því miður næ ég heldur ekki almennilega utan um annað sem þú ætlar þér að koma á framfæri við mig í athugasemd þinni. Það  má reyndar vera að myndskreyting mín með Evrópufánanum þar sem gullituðum stjörnum hans hefur verið skipt út fyrir samlita hakakrossa séu alveg á mörkunum en eins og þú kannast eflaust við þá hefur því verið haldið fram, með alveg þokkalegum rökum m.a.s., að grunnhugmyndir ESB um sameiningu Evrópuríkja byggi að mörgu leyti á sömu hugmyndum og Hitler lagði af stað með þegar hann réðst inn í Pólland á sínum tíma.

[Jóna Kolbrún Garðarsdóttir, 17.7.2010 kl. 01:29]

Ég á tvo mjög góða vini í Finnlandi og hafa þau bæði varað mig við því að Ísland gangi í ESB.  Þau hafa tiltekið mörg dæmi fyrir mig.  T.D.  Allir smábændur verða flæmdir burt, bú verða að bera sig og stækka margfalt til þess að borga sig.  Öll jarðaber verða að vaxa eins og agúrkur líka annars er þeim hent á haugana.  Engin frávik frá stöðlum eru leyfð.  Lambakjöt mun fljótt heyra sögunni til, vegna þess að það borgar sig ekki að framleiða það, og hvað með alla niðurgreiddu mjólkina? 

[Rakel Sigurgeirsdóttir, 17.7.2010 kl. 13:43]

Takk fyrir þessa viðbót Jóna Kolla!

[Hörður B Hjartarson, 20.7.2010 kl. 03:13]

    Já en Rakel! - Þú veist eins vel og ég , - að VIÐ erum EKKI þjóðin - ( eins og mágkonan upplýsti okkur  ALÞJÓÐ ! -  um í Háskólabíói um árið - sárið   - enda höfum hugfast að frá þingmönnum - , hvað þá Óráðherrum kemur ráðið - , ellegar óráðið)

    ; - ) - eða þannig .

[Rakel Sigurgeirsdóttir, 20.7.2010 kl. 20:14]

Ef við erum óþjóðin þá erum við sennilega þeir sem finna til með landi og þjóð eða: Ó þjóð! (Er þetta ekki svona næstum því svar í sama stíl og þitt

[Magnús Sigurðsson, 21.7.2010 kl. 11:22]

Sæl Rakel, þú ert kjarnyrt að vanda og það er auðvelt að finna til samhljóms með því sem þú setur fram.

Mig langar til að benda á þetta myndband:

 http://www.davidicke.com/headlines/36602-we-are-all-one-consciousness-human-race-get-off-your-knees 

Eins á fréttasíðuna http://www.davidicke.com/headlines þar eru fréttirnar oft settar í annað ljós en í ríkjandi fjölmiðlum.

[Hörður B Hjartarson, 21.7.2010 kl. 17:23]

   Rakel !

[Sigurður Haraldsson, 29.7.2010 kl. 21:31]

Takk Rakel fyrir gott innlegg gegn ESB, næst verðum við að steypa stjórnvöldum í haust því að stjórnvöld eru ekkert annað en mafía sem vinnur gegn almenningi þessa lands!