Mótmælin á Akureyri

Hann var ekki stór hópurinn sem mótmælti á Akureyri. Miðað við úrtöluraddirnar og aðra mótbyrji þá ber sennilega fyrst og fremst að fagna því að réttlætiskenndin skuli samt sem áður reka fólk áfram til að mótmæla ranglætinu sem hér hefur viðgegnist og ríkisstjórninni finnst eðlilegt að verja.

Mig langar til að vekja athygli á því að lögreglan hér á Akureyri hefur frá fyrstu mótmælagöngunni greitt þannig fyrir göngu mótmælenda að tveir lögregluþjónar stöðva umferð upp og niður Kaupangsstræti þannig að göngumenn komist klakklaust yfir gatnamótin sem leiða inn í göngugötuna. Mér þykir alltaf vænna og vænna um þetta. Þetta finnst mér skapa ákveðna samkennd enda standa þeir sem eru í lögreglunni frammi fyrir sama vanda og aðrir landsmenn.

Þegar við komum inn á Ráðhústorg þjappaði Björn Þorláksson okkur saman og flutti stutta hugvakningarræðu. Þar lagði hann út af orðum úr Sjálfstæðu fólki og hvatti okkur til að velta því fyrir okkur hverjum og hvaða hagsmunum við viljum þjóna. Á eftir mynduðu viðstaddir hring og tókust í hendur og hugleiddu í 10 mínútna þögn.
Viðbót: Vitnað er í ræðu Björns Þorlákssonar hér.

Mótmælt á Austurvelli

Athugasemdir

[Arinbjörn Kúld, 3.1.2009 kl. 17:22]

Jebb, ég var þarna líka. Lögreglumenn eru líka fólk og þetta hefur áhrif á þá einnig. Sjáumst á næstu mótmælum. Má ég heilsa þér?

[Rakel Sigurgeirsdóttir, 3.1.2009 kl. 17:41]

Að sjálfsögðu!! Ég er einmitt búin að velta því fyrir mér hvort ég sé kannski margbúin að sjá þig án þess að þekkja þig Ég skal játa það að ég er svolítill prófessor stundum

[Heidi Strand, 3.1.2009 kl. 20:54]

Baráttukveðjur!

[Arinbjörn Kúld, 3.1.2009 kl. 20:54]

Hehhehe stundum er ég úti á þekju líka. Það fer stundum voða lítið fyrir mér, mér finnst gott að virða hluti fyrir mér og hlusta áður en ég treð mér fram, Jakobína þekkir það. Þegar ég sá sjónarhornið á myndinni hér fyrir ofan þá treysti ég mér til að þekkja þig í sjón.

Sjáumst, kv, ari